人地响香港，細一年都「叻叻豬」過佢...
早幾日有位親友响Facebook分享，佢位兩歲幾囡囡嘅勞作作品。佢讀嘅同樣係阿女當年响香港某「名牌」國際幼稚園。我睇番阿女响英國剛開學嘅畫作。兩者比較之下，我真係有一番嘅滋味！（左：阿女嘅劣作 右：人地阿女嘅大作。）
大家咪誤會！我唔係覺得人地個女細一年，能夠做到咁靚嘅作品而妒忌或者傷心。我只係感慨地覺得，阿女能夠離開香港厘個教育制度算係幸運。
當年阿女未到三歲，我兩公婆都覺得嗰間幼稚園唔係好怪獸。但係今日作為第三者睇番，我發現香港教育嘅扭曲，香港家長（包括從前嘅自己）嘅問題，其實就經已响幼兒教育嘅細節嗰度。
當年我曾經四圍「開心Share」阿女幼稚園嘅大作，重要加啲「叻叻豬」。但係當時我真係無問過自己，兩歲幾三歲人仔，點樣有能力（肯定唔係天份）做得出咁似樣嘅勞作或者圖畫呢？
原因根本就係學校嘅規矩同教育嘅模式，說穿了就係老師準備好一切，比啲小朋友去做跟著做。只要用準備好咗嘅「材料」，跟著老師嘅「教導」，根本邊個小朋友都做到（可能坐响地喊都做到）！咁畫畫嘅原意乜唔係發展小朋友嘅創意咩？原來個目標只係要令家長「覺得」，自己嘅仔女有「創意」！繼而家長就好「自豪」，之後就「開心share」，重要話比全宇宙聽個仔女係「叻叻豬」。
我相信創意，除咗天份之外，最重要嘅係有自由空間。如果乜都準備晒，guide住點做，咁係六十年代工廠女工啦。而家長方面（我自己當年都有份），自知子女根本無能力自己創作到某啲野，為何要選擇去自欺欺人呢？其實全班所有學生嘅作品都係倒模一樣，有乜咁「叻叻豬」呢？
當家長需要成就感同滿足感，學校當然為咗「老細」會盡量去建構。不過結果嗰小朋友嘅所謂創意能力，就係要跟、學同抄囉！如果習慣咗係咁，先天幾有天份都無用啦！請唔好同我講「熟讀唐詩三百首，未會吟詩也會偷」或者臨慕係學書法嘅基本，因為我覺得厘啲就係中國人點解創意咁低嘅原因！要知道習慣咗去模仿同抄襲，要突破我諗要用上幾倍嘅努力！
Comments