• Goodbye HK Hello UK

成功申請T1 Startup劇透


咁都比腦細做到第一批,終於可以劇透





自從英國Tier 1响3月29號正式改革之後,好耐未正正經經咁講關於T1申請嘅新動向。唔係唔想講,而係腦細啱啱做緊單Tier 1 Startup,亦可以話係改革之後第一批申請人之一(唉,商乜業,機乜嘢密吖?)。上個星期個客終於成功攞到Endorsing Bodies嘅Endorsement,意味住腦細好叻叻豬,即係我終於解困可以劇透唔洗無份工,同大家分享下大概嘅情況。



根據腦細嘅明查暗訪,除非係有超級概念或者經驗,佢極之唔贊成依家去申請T1 Innovator。唔係因為唔識做,而係因為好多被Home Office確認嘅Endorsing Bodies,基於同Home Office溝通不足(甚至出咗個list先知自己有份做?!),未完全拿捏到啲準則。即係申請人就算有料,都有機會因為過份嚴謹而變成無辜嘅白老鼠。相反,因為T1 Startup裡面嘅Endorsing Bodies所包括嘅院校,以前都有審批T1 Graduate嘅Business Plan嘅經驗(呢個亦係腦細沾沾自喜嘅原因),所以比較清晰了解自己嘅權責同批核嘅標準。



就用個客做例子,嗰間院校(邊間就真係商業秘密)肯確認申請人嘅T1 Startup Business Plan,响簽署嗰兩年期間會提供埋地方同資源,去幫個申請人創業執行個業務,令佢成功之餘亦能夠有能力轉型到T1 Innovator。不過,每間院校現時都有內部指引,限制每年審批嘅限額,而呢個客嗰間就每年二十個。但係無規定必需要响嗰間院校畢業,甚至個客根本都唔係英國嘅大學畢業。



講到呢度,大家唔好以為係賣廣告,或者想認屎認屁。其實賣都無用,係手快有,手慢等(爆咗Quota識飛都無用),即係又係返去決心同實踐嘅問題。坦白講,希望用呢個方法移民英國嘅,唔只係香港人,仲有好多國家嘅人(你懂的)。英國政府本身無限額,但啲Endorsing院校本身有,而另外嗰啲機構Endorsing Bodies暫時又好保守,搞到件事變咗鬥快,同埋鬥有決心咁樣。

更麻煩嘅係,收到風有啲香港嘅所謂移民代理,亦開始放風聲稱「識搞」T1 Startup同Innovator。唔敢質疑人地識唔識(或者係老千)。不過根據網友所講,所謂識做原來係幫個申請人攞個Business Plan去周圍試。咁究竟點謂之試?試幾多間?都唔好講費用,每間要求唔同嘅情況下點準備?要幾耐?最唔想見到嘅結果係,咁「專業」嘅藥石亂投做法,令到英國所有Endorsing Bodies對「香港申請人」呢個Label特別有戒心,咁點算?



#GoodbyeHKHelloUK

#移民星期二

#T1Startup

#T1Innovator

#移民英國

#劇透成功個案

#識就識

#唔識就唔識

#唔好搞爛香港人個牌坊