• Goodbye HK Hello UK

英國技術移民重大改革

Updated: Jan 11, 2019


Brexit後,現有T2 Working Visa變成技術移民,對香港人及留學生有乜好處呢?




為免有人話我講嘢唔精準,所以我終於「食咗」Home office個160頁嘅技術移民改革白皮書。但係我又無興趣搬字過紙好似翻譯員咁,所以希望盡量簡單咁分析一下呢次改革,對有興趣用技術移民英國嘅朋友係好咗還是差咗。好老實講,咁當然係好處多過壞處好多啦,因為依家EU人基本上已經霸占晒大部份嘅英國外來工作人口。所以對於EU以外嘅人士,可以攞到T2 Working Visa嘅難度同做太空人或者整導彈差不多。


首先講吓現有嘅制度有幾麻煩,依家T2 Working Visa每年只有兩萬多少少嘅配額。除咗學歷技術要符合每年嘅國家所需要求,而僱主係必需要有Working Visa Sponsorship License(全國只有三萬個顧主有呢個牌)。大家咪以為個僱主有個牌就可以隨便請人,首先個僱主都要證明响本土,一段時間之內都搵唔到適合人選,就算搵啱人都唔代隨時可以請,係每個月限時限刻同Home Office申請。除咗技術學歷要求之外,每種職位都有年薪要求(至少£30,000或以上)。睇到呢度,就算有牌,你係老細你會請咩人?而留學生方面,依家嘅情況係就算叻到搵到有T2 Working Visa嘅工作,畢業兩個星期就要走,先返祖家重新申請T2 Working Visa,成功咗再入境。原因好簡單亦都好僵化,因為學生簽證係唔可以自動轉變成工作簽證。


(要留意嘅係下面所講嘅改革係唔包括公司內部調配嘅T2 Working Visa (Intra Company),亦即係話呢個種類嘅工作簽證要求依家不變,同時無論做幾耐都唔會落到永久居留或者入籍嘅權利。)





睇番香港啲傳媒經常大大聲話Brexit會來英國有幾淒涼,但係就正正因為咁淒涼,變相做就咗呢個技術移民改革,某程度上應該有唔少香港人或者留學生可以成為受益者。咁要講梗係講啲優點先啦,首先將來唔會再有每年嘅配額限制,又無聘請時限(幾時請都得),亦講到明無國籍優先(真係唔會益EU國籍),睇嘢只是學歷技術同專業機能。


//The future system will be based on principles that help to define high skilled – salary levels, qualifications, skill levels – and not nationality.//


另一個重大的改變,就係學歷技能嘅最低要求。現時每年Home Office都會定出邊一啲係國家需求嘅工種,唔使問作為全世界最高級最高需求嗰啲。但係改革之後,最低嘅學歷要求係A-Level或以上。而工種方面,就變成商業機構管理層(亦即係Managerial Grade )開始,即係稱之為RQF 3 (Regulated Qualification Framework 3),大家睇下邊個圖大概就知道RQF 3係幾咁適合香港人。




雖然Working Visa Sponsorship License呢個制度仍然有效,但當中改變嘅嘢亦唔小。要攞到呢個牌,已經未必係大型商業或者政府機構先有能力。因為白皮書提到,明白都有啲僱主或者中小企,未必有資源或者經驗去申請同處理呢個牌照,所以每日好特別簡化嘅措施,專門比中小企申請Working Visa Sponsorship License。更重要嘅係,所有有呢個牌照嘅僱主,唔再需要證明响本地請唔到相關嘅人才。當然僱主亦都有佢嘅責任,最基本嘅就梗係要確定個員工係有返工執行返所定嘅職責,另外就要負責比員工每年醫療費用(因為英國NHS係全國免費醫療制度)。不過咁個員工可以帶埋家屬去英國,最開心既係個老婆或者老公係可以搵工嘅(向唔需要工作簽證嘅情況下)。世事唔會樣樣都會咁完美,其中一角無變嘅,就係每年嘅薪金要求仍然係£30,000,呢個係要保障國內薪金嘅穩定(唔比外國人頂爛市)。



有一樣係我個人覺得有趣嘅睇法,可以係特別關香港人事。因為白皮書裏邊提到,會容許一啲同英國有特殊關係或者合作嘅地區嘅居民,可以用遊客嘅身份搵工。如果搵到的話,個旅遊簽證可以唔洗返祖家就可以變成工作簽證。


// We intend that nationals from specified low risk countries, including those with whom we have reached a specific agreement as part of bilateral negotiations, should be allowed to look for work having entered as a visitor and apply to switch into the skilled worker programme. /


點解我會覺得關香港人事呢?因為香港就係英國同八個其他國家合作互換所謂嘅Working Holiday年青人嘅其中一個。帶返個頭盔先,呢個純粹係本人嘅推測!無論點都好,咁香港嘅年青人如果有機會去英國Working Holiday,咁係咪可以有機會探索關系同機會,將來搵有工作簽證嘅功呢?


// Youth Mobility

The UK currently has youth mobility arrangements with Australia, Canada, Hong Kong, Japan, Monaco, New Zealand, South Korea and Taiwan. These schemes allow people aged 18-30 to come to the UK for two years, during which period they can work or study. //





咁最後一個改革,就係關留學英國嘅學生事。呢個係英國賺錢教育問題,因為依家嘅所有攞留學簽證嘅學生,讀完書就即刻要走(除非特別申請留多幾個月)。既無時間搵工,搵到亦都不能夠就地轉簽證(因為僱主要證明比較多嘢)。所以直接影響左近年留學生嘅數目,衰啲咁講即係無順便攞居留嘅機會。但係今次個改革講到明,學位或者碩士畢業生,畢業後有六個月時間可以留低响英國搵工,而博士生就有十二個月時間。呢個睇嚟好似好合理好簡單嘅放鬆,其實張上面嘅嘢加埋一齊睇,就知英國政府好明顯想吸納同留低更加多人才。


其實呢份改革嘅白皮書,主要嘅目的就係講解Brexit後EU人口唔再係自由流動,無掩雞籠咁免簽證工作出出入入,控制唔到移民人口同質素嘅處理方案。就因為無咗EU人無限出入嘅掣肘,咁就可以正正式式咁响全世界搶人才,那怕寬鬆些少,至少都係國家內部可以調控。同時間又可以借機,重新調整嗰啲低技術又帶埋全家黎英國定居嘅問題(以後低技術勞工唔可以帶家人,時間唔會多過十二個月,亦無申請居留權)。至於已經响英國生活或者工作嘅EU人士,如果需要申請家人黎英國,就會同所有家庭團聚嘅方法一樣。


唔怕煩有興趣閱讀嘅The UK's Future skills-based immigration system white paper原版下載傳送門:

http://bit.ly/2Rfq7ql


#英國移民

#技術移民

#工作簽證

#GoodbyeHKHelloUK

#死移民Agent之日常

#移民星期二


31,690 views1 comment