香港人心裡同英國人眼中，好區與否是有差別的？
百無了賴跟咗個香港黎嘅朋友去睇樓，唔知點解係都話要我幫下眼。其實我唔知自己對眼同意見，有咩實際作用。大家嘅感覺、價值觀同需要都唔同，唯有唔出聲當社交節目。 佢驚英國啲樓同英鎊遲啲會升，所以諗住買定將來自住，暫時租一兩年出去。
你估香港咩，日日升到唔識停。今年全國都無乜升，甚至倫敦重跌添。厘個月英國啲業主啲叫價，減價減到儍。脫歐喎？唔係國際趣聞，每天都有唔同消息影響所有（係英國所有嘢）。同佢講又唔信，去爭論咩？我又真係無水晶球。
睇完幾間，個經紀介紹嘅時候講好多治安、學校、環境同鄰居質素嘅嘢。離開之後個朋友就同我講，話個經紀點佢。點解搵啲咁隔涉去邊都要揸車嘅地方，附近又無乜地方食嘢（中餐）同買嘢。又話完全無話佢知，升值潛力，只係講租金回報。 我都唔知點回認佢好，唯有用香港萬能答案：「英國係咁㗎。」英國唔計要番工方便厘個因素，居住最重要嘅嘢咪係個經紀講嗰啲囉！又話想學我搵靜靜地嘅地方，但係又嫌遠。
响地鐵上蓋，下面有商場，落街行十分鐘有燒味同點心食好唔好？乜嘢叫升值潛力呢，都話英國今時今日無人有水晶球啦！其實不如留番啲錢响香港買啦，咪有晒所有要求囉！再唔係倫敦唐人街酒樓上面啦，"ZONE ONE"添呀！ 以上嘅說話只係响我心裡面，點會講出口。
コメント