• Goodbye HK Hello UK

脫乜歐





早幾日睇咗個CCTVB什麼英國脫歐分析嘅特輯,當中嗰啲眼界同視野的確令人嘆為觀止。英國本地經濟會不明朗?英鎊短期波幅比較大?但英國其實對世界影響力好低,所以唔會特別對香港有太大影響?其實你同我阿媽係女人,人類唔抖氣都會死,真係㗎?好叻呀?唔敢話自己有乜真知灼見,只係人在英國,日常睇埋一大堆本地新聞同分析,所以角度會多一啲。


首先大家要明白EU呢樣嘢,其實同情侶情到濃時結婚差唔多,初頭緊係充滿愛咁諗住合作耍玉女劍法。但幻想美麗,現實殘酷,仲要廿八個成員雜交。既唔同文又唔同種,背境收入文化樣樣都唔同,反面係遲早嘅事。好多人會覺得難民問題係英國脫歐嘅主因,其實只不過係一個導火線。真正原因香港人會好容易明白,留歐同脫歐兩邊嘅諗法,講到底就係國家自主權同揾錢至上當中嘅選擇。


好多英國人長期不滿EU議會同法庭凌駕於英國國會同法庭,即係下下中央話事,仲要硬塞啲低端人口比我?(香港人,你懂的!)而支持留歐嘅多數係做生意,中產同年青人,做生意嘅同埋中產諗乜原因唔洗特別講。而年青人方面,大家要明白英國人從來工作流動性好強,入咗EU後就更勁,入嘅係勞工出嘅係專才,脫歐即係影響前(錢)途。加埋愛爾蘭(EU成員國)同北愛爾蘭(英國本土)嘅邊界,到底有無一地兩檢、兩地兩檢、還是唔驗唔檢?


好多人覺得EU對英國脫歐立場好一致,試問廿七個國家點會一條心吖?大家响國際新聞見到嘅所謂狠勁嘅立場,不過係最大(同最嬲)嘅法國同德國,因為英國係EU之中比較有錢夾錢嘅成員。其它嗰啲嘅立場要求目的都唔同,其實同EU代表正式談判之餘,May姐亦會鬼鬼祟崇咁同嗰堆國家傾計(合縱連橫咁囉),結果法德兩國緊係仲慶啦,呢幾個月黎到趁埋牙咪反枱囉。


中文所謂嘅「硬脫歐」,現在嘅解讀應該係叫No Deal Brexit,即係放低分手費即走,頭也不回,只做一個WTO成員國,對嗰廿七個國家整體或者分開遲啲傾。係咪世界沒日呢?可能係,除非唔係,啲友講到會變咗北韓咁,咁北韓死得未呀?其實咁樣的話同樣對EU當中唔少國家亦都係七傷拳。東歐無咗個勞工市場,北歐多咗個北海惡性競爭捕魚,西班牙無得攞直布羅陀著數,愛爾蘭就多咗個欄隔住咗英國做孤島EU國,意大利會學脫歐走數,法德要比多好多養住啲破產國,可能係提早攬炒。


無論點都好,波已踢爛,大家都玩到騎虎難下,收手咪好無面?本來係留歐派嘅May姐,佢未必係最傑出嘅領首相,但英式陰濕古惑一定有餘,平衡國內外之餘結果得到咁嘅Deal,係無人會特別開心。啲人話英國脫歐會仆街,有啲人情願窮都要尊嚴,另外有啲就覺得「係咁㗎啦!」無所謂,唔好話英國人啦,香港人何嘗唔係為呢啲爭拗分裂到癲呢?無論點結果點都唔會好得去邊,不過當年邱吉爾為咗國家,向美國認契弟,答應放棄所有殖民地都得,英國人有咩做唔出?係咪開始明點解Trump Trump唔太鐘意個軟腳Deal呢?


#傷就一定

#有幾傷

#有幾痛

#痛幾耐

#唔知


#寫完自己都覺得悶

356 views1 comment