• Goodbye HK Hello UK

T1 Startup與Innovator完整概念


唔簡單嘅懶人包,機會留比有決心嘅人

2019年3月29號開始,英國原本嘅T1企業家移民方法,將會完全改變,由T1 Startup同T1 Innovator所取代。經過稍為仔細嘅消化整個Home Office提交比國會嘅草擬法案,得出嘅睇法可以話係有驚亦又有喜。同時英國政府彷彿要話比大家知,那管無乜錢,只要有橋有能力同自信,本國多多都歡迎。


喜嘅地方係,首先門檻比以前低咗好多,即係至少入場券平咗。英國政府更大方嘅係,成功申請又滿足要求嘅人,只要三年(唔洗五年)就可以申請永久居留權。當今世界當然唔會有越改越容易嘅移民計劃,而批核同中間嘅審查就係最驚嘅地方。


因為新嘅政策點都會實行,所以唔打算比較新舊T1嘅不同之處(比較已無意思)。首先大家要明白T1 Startup 同T1 Innovator嘅分別。T1 Startup係比嗰啲無做生意經驗,但有概念創意嘅人申請。申請人無年齡、學歷或者經驗限制。當然英語水平要達到B2(IELTS 5.5),如果擁有用英語教授嘅大學學位,經認可後可以豁免。同時要有一個Innovation(創新)、Viability(可行)、 Scalability(擴展)嘅Business Plan(下面再解釋)。成功申請的話,申請人有兩年時間(唔計入居留期)去實踐個業務,到自己覺得時機成熟嘅時候(大膽嘅可以幾個月),申請轉個簽證做T1 Innovator,亦無硬性規定一定要投資指定金額。


咁咩為之Innovation、Viability、 Scalability呢?法例嘅草案裡面係有解釋嘅,不過坦白講係有啲空泛。Innovation所指嘅係真實而又對市場有競爭力或者有需求嘅計劃,Viability係需要申請人有能力或者有經驗營運計劃裡面嘅業務,Scalability係有關業務可能會响營運或者勞動市場有增長。呢啲要求可以話有辣有唔辣,老實講,有心創業做生意,邊個唔係想咁?


T1 Innovator就係比有做生意經驗嘅申請人,要求基本上同T1 Startup一樣,唔同嘅地方係申請人要投資£50,000响自己嘅業務上面。睇到呢度大家會明白,T1 Startup同T1 Innovator嘅分別就好似打機升Level咁上下。而兩個途徑嘅審批都係由政府指定嘅Endorsing Bodies負責,而係咩機構就暫時未有公布,不過相信好大機會係基金公司、大學同相關業務嘅公會團體。


相關嘅Endorsing Bodies會响T1 Innovator申請人成功申請後嘅6、12、24個月,審查申請人嘅業務進展。最後只要滿足到下面七個要求裡面其中兩個,申請人就可以申請永久居留:


1. 投資了最少£50,000經營Business Plan裡面嘅業務

2. 將客戶嘅數目同最初三年前多一倍,亦要高過英國同類生意嘅客戶增長平均值

3. 業務進行研究同開發,繼而响英國攞到知識產權保護

4. 最後十二個月嘅收入達到£1,000,000

5. 最後十二個月嘅收入達到£500,000,其中£100,000嘅收入來自出口

6. 有10個全職擁有永久居留權嘅僱員,每位需在職不少於12個月

7. 有5個全職年薪不少於£25000擁有永久居留權嘅僱員,每位需在職不少於12個月


大家可能會問,萬一申請人嘅計劃唔成功或者達唔到目標咁點呢?係可以諗過一條新橋,做過一個新Business Plan再申請嘅,不過壞處係時間可能要重新計過。


表面上好似好高要求,當考慮到門檻調到咁低,其說穿了,不過係希望申請人,認真咁去營運一個對自己同國家有利嘅生意。可能有啲朋友感覺好難,但係只要細心留意下,其實講嘅不過係決心問題。





7,542 views1 comment