「英國脫咗歐咪仲衰！去黎做乜吖？」
對於英國脫歐後嘅工作簽證技術移民改革，雖然2021年先會全面推行（等啲EU人走得六六七七），某程度上的確對EU成員國以外嘅人（尤其是香港人）寬鬆咗。但某啲香港嘅朋友心目中，好似仍然有好多唔滿意。响云云嘅討論裡面，留意到「脫歐之後分分衰香港」嘅睇法。其實到底係英國脫歐後會衰咗？還是又係把口話移民，心裡面嗰一萬個唔想走嘅借口之一呢？
從來都係嗰句，移民與否係好個人嘅諗法，而走去邊亦係主觀嘅意願，但總係有啲客觀同理性嘅原素。我討厭政治，但喜歡邏輯（但未必精準）嘅分析。脫歐太複雜嘅源由無謂嘥時間講，不如假設Brexit最衰（即係No Deal硬脫）嘅後果，然後大家對比下香港呢片福地現在嘅情況好嗎？
所謂脫歐，那管係最硬嗰隻，說穿了就係脫離一個整體圍爐嘅組織，即係攞返個「英人治英」嘅自主權，大家好明啦。坦白講，英國肯定唔係超級大國，甚至係沒落皇國。不過點衰仍然都係世界第五經濟體，失業率只有4%，而倫敦係世界兩大金融中心之一。而且仲係守信用嗰種WTO會員國，英聯邦之首，美國嘅盟友，亦係聯合國安理會常任理事國。最重要嘅係，英語繼續係地球同網絡上（唔係某區域）最多人用、識同學嘅國際語言。
講到呢度，脫歐有短期經濟震盪又如何？難道會被國際孤立，繼而經濟崩潰，然後亡國嗎？退一百步咁講，講經濟差，日本經濟差咗廿幾年，有無事？再退一千步，台灣何嘗唔係被迫孤立，死得未？退多一萬步好唔好，北韓同伊朗被國際制裁到咁都未要亡國啦？
講咁多嘢，其實無結論㗎，只係一個客觀討論同思考！覺得香港好咪留低，覺得英國衰嘅就唔好去，一切都不過係「感覺」同心底裡嘅「理由」，移民始終係一個個人同家庭嘅決定。但係，有一樣要注意嘅係，世上係無人間天堂，地球亦唔會跟住某啲人為中心地轉，然後自動送上最好的東西。