如果剛剛到步英國，要揸車同買車。第一件事要諗嘅嘢就當然係個車牌。如果响香港有車牌嘅朋友，其實香港嘅車牌係可以响英國使用一年嘅。因為厘個原因，買汽車保險亦都可以用番個香港車牌，不過同樣只可以用一年。之後就要換英國車牌，網上係有Form填好，郵寄就可以。
厘樣嘢其實對於我厘啲住郊區嘅人都幾重要，因為無車等如無腳。最初黎到租咗兩個星期車，我自己就已經有個廿幾年嘅英國牌，我老婆係用香港車牌加個國際牌做後備。
咁即係，我地要响兩個星期內要買車啦。我地其實未去英國之前已經決定唔會買新車，因為我兩公婆覺得唔需要。英國嘅德國車的確係比香港平好多，但係我地覺得無必要而且唔實際（當然我自己有私心啦~Defender😜）。而最大嘅原因係因為兩公婆都係初到步，未有信貸評級，即係買新車的話要比全數現金，一次過要買兩架啱心水又揸到幾年嘅車，係幾肉赤嘅。
要明白响英國要建立信貸評級同响戶口有幾多同搵幾多錢係無必然關系嘅，Credit Rating係借唔借嘅問題，而搵幾多就係借幾多嘅問題。咁初初黎到，點樣最快去儲Credit Rating呢，咁就要去網上申請一張係人都批，又極小Limit嘅Credit Card。每個月都用小小，同時每個月都還清，咁個Credit Rating就比較快build up。（唔係我自己識嘅，係有人教嘅，係人地嘅經驗。😉）
個人嘅經驗，香港人所信奉嘅所謂歐洲中產「名車」，其實真係唔係咁可靠，只要大家有朋友擁有過多過四年就自然明白，亦都可以理解點解厘類車响香港二手咁平。😰
英國買二手車，其實好方便。而每一部車嘅車牌號碼，已經係响網上面有晒所有資料，包括係唔係自己入口（水貨），幾多首，有無大意外claim過保險（Category C &D），有無改過顏色同車牌號碼等等（當然要比錢check）。英國買二手車，有啲資料係好重要嘅，例如法例規定，每架車三歲之後每年都要驗車（MOT），另外大概每10k Miles到就要做Full Service，厘兩樣records係一定要睇嘅。
上網搵車，打電話約時間試車。其實英國車嘅牌簿（V5C Form）係連同出口及轉手嘅Form，如果試啱，上網買保險，跟著就比錢。賣家就會叫你填咗張Form，撕咗出黎，比個牌簿個買家。之後個賣家會自己寄番比政府部門，大概兩、三個星期買家就會收到張新嘅V5C。
咁買保險方面，都係上網買嘅，有好幾個website都會有格價。只要輸入想買嗰部車嘅車牌號碼同個人資料，就會有一個大概一星期有效嘅Quote，到決定買入部車就Login番比錢就已經可以揸架車走。
因為我自己十幾歲已經响英國考牌，而我又係一個中坑，所以我無留意去用香港嘅NCB。但係多謝厘個Page嘅熱心朋友Teresa Li 提供資料，原來英國嘅汽車保險公司係承認香港嘅保險NCB嘅，咁大家又可以慳番啲。
Insurance Photos Credit: Teresa Li 🙏