係改革，唔係落閘
實際情況當然唔係傳聞咁啦，而呢啲亦只係啲一知半解，為咗跑數嘅移民Agent嗰啲小童奸計。其實每年四月，英國Home Office 都會對所有居留簽証嘅要求、費用、程序或者指引作檢討同調整。又因為下年（2019年）英國好大機會脫歐，為咗整合移民政策，所以黎緊嘅四月所有居留簽証（即係移民計劃），會有好大嘅轉變同調整。所以今次希望認真些少詳細分析下，啲變動對希望移民英國嘅香港人有咩影響。
唔好咁心急，亦唔洗太騰雞，等我逐樣講。賣弄嗰啲「慘喇，替大家擔心哦！」肉麻嬌情嘢講黎無意思，幫人解決問題，總比拋啲難題出黎嚇神嚇鬼有建設性。首先大家要明白點解，英國會大幅度改革移民政策。脫歐嘅結果無論點都好，英國長遠對移民嘅國策，係既希望盡量減少只係黎攞福利嘅低端移民，另一方面就要大量吸納更唔只歐洲，而係全世界嘅人才去保持國家脫歐後嘅競爭力。就正如T2 Working Visa都可能會改革變成技術移民計劃，都要等脫歐搞掂晒2021年先會實行。
Tier 1 Graduate同Entrepreneur取消？
轉變得最多，就係Tier 1裡面所有嘅類別嘅居留簽證。用二百萬鏟鎊投資債券股票，變相好似買護照嘅Tier 1 Investor，响啱啱過咗嘅2018年12月7號全面暫停，原因係政府想防止申請人，利用洗黑錢然後順便走佬移民。所以將來呢類申請，會有更多資金來源証明嘅要求。至於影響香港想移民嘅朋友最深嘅，莫過於取消Tier 1 Graduate同Tier 1 Entrepreneur。不過與其話係取消，不如理解為係深度改革，配合國家整體移民政策。
Tier 1 Graduate本來比指定嗰一百間英國院校畢業生申請，要求申請人嘅Business Plan要畢業嗰間學校嘅校內部門或學系認可，然後投資£50K。而黎緊2019年春天，Tier 1 Graduate就會取消，變為T1 Startup，一睇個名就知係有初創嘅取向。比較明顯嘅變化，就係由英國本土局限100間英國本土大專院校，擴展到全世界嘅大學（咁緊係會有準則唔係野雞啦）。Home Office當然唔會貿貿然接受外國院校，自己認可申請人嘅Business Plan 。所以就會靠一啲獨立Business Sponsor負重執行認可嘅角色。
同時負責移民政策嘅官員透露，現行嘅Tier 1 Entrepreneur將會响2019年春天取消，形式將會類似T1 Startup咁樣，希望吸引有經營生意經驗嘅生意人。亦說明申請人嘅Business Idea都係需要得到Business Sponsor認可，當中會考慮嘅包括創意，可行性，同發展潛力(innovation, viability and scalability)。呢啲Business Sponsor相信可以係政府部門或者相關行業有可信認受性嘅獨自機構或者公司，例如創科基金或者核數師。佢地都要註冊成為Business Sponsor，得到Home Office嘅認可，亦要受Home Office嘅指引監管。唔係外判批核咁簡單，係拜拜偷呃拐騙。
Business Sponsor唔係外判審核
大家可能會覺得，本來由Home Office自己批，依家變到好似外判咁。作為行內人，我嘅睇法就有啲唔同。依家嘅做法，主要係靠Home Office內部指引，用一個Genuine Entrepreneur Test，去考慮所有唔同申請人嘅Business Plan。
對營運生意嘅真實性。但係呢個方法好僵化同主觀，現時比較多漏洞同既定套路。咪以為Home Office蠢到唔知，好多移民公司（老千）利用呢套路同漏洞响條街度偷呃拐騙。依家改到要獨立機構，根據唔同嘅行業專家去評核。咁就可以杜絕嗰啲聲稱「有錢就得」嘅方案，而確保申請人係了解清楚自己嘅Business Idea係咩。
暫時嘅總結
其實T1E嘅申請難度從來都唔容易，只係坊間太多天真嘅誤解。將來申請人對自己嘅Business Idea需要更深入嘅了解，亦證明個業務係可行。嗰啲「投個信得過嘅Project」或者Director Loan睇黎就好難搞。而如果無做過生意經驗嘅，可能申請前嘅功夫就比較多，或者事前需要報讀啲同個Business Idea相關嘅課程。
暫時所了解同認知嘅就係咁多，因為仲未知啲機構點申請個Business Sponsorship，所以到時自然會更公開同標準，唔會好似依家咁，Home Office得一個標準去審批所有業務。咁到底衝唔衝閘？趕唔趕四月前用舊制申請？大家自己決定啦。
P.S. 嗰啲居英權或者British Citizen申請家庭團聚嘅，咪高興食花生住，因為可能財務要求同申請費都會下年四月順便加嘅。
Statement of Changes in Immigration Rules:Written statement - HCWS1159原文：