花生何其多，Director Loan爆煲
無論响自己本書或者個Page度，明示或者暗示咗不下幾百次，希望大家小心嗰啲用Director Loan入股二十萬鎊落個現有Project嘅T1E企業家簽證方法。可惜嘅係，難聽嘅說話永遠都唔會有人肯聽，甚至有人會覺得我呢個死移民Agent只係葡萄其他人先會咁講。公司名我就唔會講，呢件事有苦主大聯盟出黎之前，坦白講其實都收到風。不過有啲苦主收到回水，而腦細又千叮萬囑，叫我做人厚道啲，所以我當初只係寫咗「回水不是最大保障」嗰一篇文，希望隱晦地希望大家小心啲。
新制度出現加上爆煲效應，「衝閘」熱潮
但估唔到嘅係，睇嚟好啲苦主連錢都收唔番，簽證的攞唔到，攞到亦都唔會續到。都係嗰句，大家小心啲考慮。但是話說回來，將來都唔需要小心，因為英國T1E同T1G企業家簽證，响2019年4月將會被T1 Startup取代。因為响新嘅制度下，所有申請人嘅Business Plan，都要由Home Office指定獨立嘅行業Business Sponsor去評審。我唔敢話新制度係比之前難咗，但可以肯定嘅係嗰啲什麼投個現有Project，每年開四次會，聲稱好穩陣嘅方案就會自然消失。
事實上，自從新制度放風開始，香港嘅一眾移民公司，都好似被點咗穴咁，唔知點反應。一係講到好似世界末日咁，不停催促啲客上尾班車「衝閘」，再唔係，就完全停止哂所有所謂英國投資移民計劃嘅宣傳。其實不過係政策嘅優化同埋杜絕現有嘅漏洞，根據個人經驗同學歷，去做一Business Plan營運一門生意，從來都係一個正當嘅做法。只不過審批嘅機構唔同咗，需要嘅只係移民顧問或者律師了解唔同行業嘅新批核準則，都唔知點解大家都好似好驚青咁？
腦細有生意都唔想做，點解呢？
當然腦細都有唔少客人都希望「衝閘」，趕及响新制度實行前用番現有嘅制度申請T1E。雖然無人會嫌錢腥，但腦細做生意總係有底線。上個禮拜佢決定叫我通知嗰啲仲係心大心細嘅客，無論幾多錢都好，都唔會再幫佢地用現有T1E程序衝四月呢條線，希望佢地等T1 Startup詳細公布同實行先做。
原因好簡單，T1E最基本嘅要求就係有三個月嘅資金證明，依家已經一月中。況且，都唔好講嗰啲濕碎嘢，剩係做個客嘅Business Plan都已經好趕。要明白英國移民顧問係有監管嘅，況且專業服務行業最需要嘅係服務質素，賺到搵到但係交唔到貨，同殺雞取卵有咩分別？