不成功，便回水？邊有咁簡單？
香港人搵人做任何嘢，最希望就係保証成功，「不成功，便回水」就更理想。有啲人甚至覺得既然比咗錢，最好自己乜都唔洗做，唔洗理。正所謂「比得錢，就係唔想自己煩。如果咁都要煩到我，不如自己做啦！」。結果有好多人當決定移民搵移民顧問或者律師嘅時候，最關心之處就係「成功率」。好多時候都忘記咗，其實嗰啲顧問或者律師係用緊自己嘅經驗同技術，去幫申請人去切合目標國家嘅移民政策，最終成功與否除咗關乎啲顧問或者律師嘅質素之外，當中必需嘅嘢係申請人配合同緊密嘅溝通。
可以大膽啲講，移民英國嘅成功申請機會率，至少有三四成係取決响個申請人自己嗰度。那管移民顧問或者律師幾叻幾醒，如果個申請人懶懶閒，係變唔到個Residence Visa出黎。响乜都未知，咩都未睇，只要比錢就可以講到成功率嗰啲，我估叫做老千多過顧問，甚至稱唔上係Agent。所以移民顧問或者律師本身叻唔叻，係一回事，而個客人願唔願意配合，又係另一回事。嗰啲古靈精怪衰响自己手嘅申請個案，將來再同大家分享，唔好離題太遠。
腦細做好人，成就我份工
成功批核當然係好重要嘅首要第一步，但係好多人都抱住過咗海就係神仙嘅心態，彷彿唔記得其實移民英國係嘅Residence Visa五年裡面係分兩次批。唔少已經land咗嘅開心到忽略咗，第二次續簽嘅要求，其實同第一次申請嘅時候一樣咁嚴格，分別只係當中所需嘅資料唔同（有啲Residence Visa嘅要求係一樣嘅）。覺得最初成功咗，住夠五年就自動攞到永久居留（其實都係要申請嘅），都唔好講之後嘅入籍做個真正英國人。
當大家覺得理所當然嘅時候，其實年中有唔少人因為唔能夠續領第二次嘅Residence Visa，而需要返家鄉重新申請、上訴或者同英國Home Office去拗呢樣嗰樣。搞到要返家鄉再申請續期係一個惡夢中嘅惡夢，錢銀反而係最唔緊要，都唔好講Home Office嘅記錄，最慘係既放棄咗香港原有嘅事業，又停晒剛剛融入嘅英國新生活唔上唔落。
遇到呢類問題嘅人，要搵移民顧問或者律師幫手係比任何人難。好多移民顧問同律師都唔太鐘意，做啲咁麻煩嘅案件。原因好簡單，吃力未必討好，而且要承受好多「負能量」，不如做多兩單正正常常嘅好過。本人嘅老細係一個正正常常嘅英國註冊移民顧問，現今世道就算唔呃唔騙，做正正常常嘅移民生意都唔會窮得去邊。但佢唔知邊度黎咁多善心，好鐘意耐唔耐心軟接呢類奇難雜症。呢啲個案通常都係比人賺晒啲錢（唔敢話係呃），被啲so-called行家遺棄、中咗伏或者自己搞到亂晒龍。不過無論如何，唔係咁，我就唔會可以短時間見識到咁多嘢。
講咁多廢話，我份工到底做咩嘅呢？
移民顧問响英國，係一個專業，需要比較多經驗同技術，仲要受政府部門嚴格監管。而响香港遇到嘅，好多係移民代理（英文係Agent？），係受出版《選擇月刊》嘅消費者委員會監管。當中嘅分別，
聽講聲稱係無嘅。當然我本人並唔係英國註冊移民顧問，不過我係一個長期失眠又對英國移民政策有些小知識嘅香港人。就係呢幾個「賣點」，老細就塞咗我去負責同公司香港嘅客人聯絡，正常嘅情況咪係收集下資料同講解進度。不過更多嘅就係做深宵電台主持咁安撫嗰啲，老細唔知响邊接番黎嘅奇難雜症慘慘豬。
有人話我係死移民Agent，概念上可能係除非唔係，因為做嘅嘢都係同香港嗰啲靠把口嘅差唔多。但係我又覺得自己所見識過嘅，可能比好多港式代理多。就好似啲當夜嘅急症室護士一樣，雖然唔識點樣落手落腳醫人救命，不過日中見識咁多傷風感冒或者斷手斷腳，最低限度都識點「分流」同大概知道個病人死唔死得。
本來分享嗰啲賺人熱淚嘅成功個申請個案，一定係最大路同吸睛，不過咁就等如嗰啲所謂嘅富豪自傳同語錄咁唔實用（睇咗唔會自動發達）。相反，分享嗰啲無乜人會攞黎講嘅奇難雜症同「失救」同「中伏」例子，可能會有對大家有更多啟發性。所以希望盡能力每日星期二，分享我呢個死移民Agent嘅日常。