• Goodbye HK Hello UK

不如留响香港啦!


就算是老朋友,都忍唔住咁講...





移民呢個香港熱門話題,因為黎緊四月改T1E制度,就多咗身邊嘅朋友揾我討論。對友誼呢樣嘢,都比較有要求,所以「識」嘅人多,但「朋友」就有限。尤其是嗰啲「係咁㗎啦!」嘅零思考嘅人,的確識都唔識多個。反而對於朋友嘅立場,就無乜所謂(最緊要坦白),更加唔會理地位身份財富高低。


例如我有個朋友,响北京返工生活揾錢嘅上等中產,娶個人造人咁靚嘅老婆生埋小朋友。生活美滿到心態上融入個社會,既唔會講啲肉麻嘢,亦唔會心裡有不滿諗住離開。呢個係人地嘅生活人生選擇,我尊重到非常,唔會笑,更加唔會不屑。畢竟係個人嘅生活選擇,關其它人乜事?


相反,另一個朋友响香港,兩公婆係神科出身,有對仔女有樓有車,都係同我以前咁嘅偽中產。佢就煩喇,我意思唔係佢本人自己煩,係煩到我。成日對香港嘅情況怨天怨地扮晒黃晒絲咁,又擔心兩個寶貝嘅將來,成日問我好唔好走,幾時走,之如此類。


但係每當我答完佢,次次都用一萬個差不多嘅理由回應,點解唔想走。移民監(?!),仔女唔識中文,無工人,揾少咗,驚老婆唔習慣呀,呢樣嗰樣。足足兩年,電話親身全家黎都仲係講呢啲。好啦,終於比佢「等到」T1V(佢有呢個錢㗎!)停咗,T1E又改制,又再問我趕唔趕得到切改制前申請。我咪話今日決定咪勉強趕到囉,點知佢兩公婆又黎錄音機重複Loop...


最後,我真係忍唔住,廿幾年老友都係咁話。咁辛苦?其實反轉諗,試下考慮接受同擁抱香港會唔會舒服啲呢?


#做人乜有完美嘅咩

#唔好

#GoodbyeHK

#試下

#ILoveHK

1,187 views1 comment