• Goodbye HK Hello UK

裝備自己移民英國

Updated: Jan 11, 2019


如果係有心移民英國嘅,响咁多新政策下,應該點理解同準備好?




因為2019年3月29號開始,英國九成九九會脫離歐盟。無論係有Deal(軟)或是No Deal(硬)脫歐也好,英國嘅移民政策都會作出重大嘅改變,例如現行嘅Tier 1 Entrepreneur (企業家簽證)、Tier 1 Graduate (畢業生創業簽證)都會被新嘅Tier 1 Startup Visa制度取代,新制度會响2019年4月詳細公布。而Tier 2 Working Visa就變成技術移民,亦可以話係將2011年取消咗嘅技術移民重新包裝响2021年前全面推行。其實今次Teir 1簽證同技術移民政策改革嘅核心概念,宏觀黎睇係一個英國移民政策嘅整合,講到尾目標只有一個:放棄以前歐盟國民無限制咁出入,轉變為吸納各種級別嘅國際人才。對有興趣移民英國嘅香港人,一定好處多過壞處,但同時就要面對國際職場(鬥獸場)競爭。所以嚟緊嘅日子,有心移民英國嘅人,要準備嘅並唔係錢,而係裝備自己嘅競爭力變成Gladiators,進入國際職業人材鬥獸場。


先講最快實行嘅Tier 1 Startup(之前已經分享過),雖然未有詳細嘅要求,但大家要留意呢個很新嘅T1 Startup簽證既取代T1E同T1G,當中有兩個重要分別。現時T1E嘅所有審批包括申請人嘅Business Plan都係由Home Office自己用一個叫企業家真實性( 'Genuine Entrepreneur' Test)嘅內部指引去衡量,而T1G嘅Business Plan就由申請人所讀嗰間院校內部考慮同確認可行同真實性。將來嘅T1 Startup嘅Business Plan批核部份,就由Home Office指定嘅Business Sponsor負責,考慮嘅因素係包括創新程度,可行性,同發展潛力(innovation, viability and scalability)。


至於技術移民,技術移民改革白皮書(The UK’s future skills-based immigration system December 2018),好多香港人嘅焦點放响技術移民,其實當中包含咗好多唔同嘅移民政策更改,包括難民、學生同旅遊簽證(歐盟及其他國家公民)等等嘅政策。但係值得留意既係,其實技術移民同上面所講嘅Tier 1 Startup Visa係有一脈相承嘅,吸引國際上各個階層嘅人材整合。簡單來講,最出色的人才就可以用每年增加到2000個名額嘅Tier 1Exceptional Talent visas(呢啲X-Men類嘅無謂講悶親大家),而一般有創意嘅創業人士(又有啲錢)就可以申請Tier 1 Startup Visas,最後就係有技術黎英國工作嘅技術移民。


睇晒咁多種轉變,關大家咩事呢?就係香港人,响國際社會既競爭力嘅問題。衰啲咁講,因為之前香港人太難攞到英國嘅工作簽證,而真正嘅投資移民簽證(Tier 1 Investor)成本又高到癲(至少二百萬鎊,但暫時停咗),所以好大部份人都係用T1E呢種居留簽證申請。本人講過幾千次,T1E係要自己落手落腳營運一門有配合自己經驗學歷啊嘅Business Plan生意,可惜市面上太多人(唔敢話係老千),利用Home Office嘅程序漏洞,提供嗰啲Director Loan或者投個Project黎做股東嘅「買護照」方案。我個人唔鍾意幸災樂禍,聽講近期有啲咁嘅Project爆左煲,周街都係苦主,呢啲唔到我或者大家去理。但係講到將來,Tier 1 Startup嘅Business Plan批核評審,一定唔係外判咁簡單,而係每個行業都會有相關有信譽嘅業務機構(Sponsor)去做批估(邊啲機構做,點做,難還是易?未知)。咁即係唔係淨係講錢咁簡單,申請人係要切切實實咁要深入了解自己識啲乜,同會做乜。用番市面最鐘意吹嘅例子講,Franchise間漢堡包可能就要被特許經營商會評核,記住喎,要包括創新程度,可行性,同發展潛力(innovation, viability and scalability)。


而技術移民方面,其實白皮書裏面睇咗好多次英語能力呢個問題。我並非想潑冷水,或者貶低香港人嘅能力,但係我哋係唔能能夠將自己放响地球嘅中心。希望大家明白,那管英國技術移民工作簽證係寬鬆咗,亦無人口數目限制,事實地球上有好多既熟悉英語又同樣有技能嘅競爭者。而且有一個重點大家要留意,技術移民呢個簽證嘅特色,係要先搵到工先可以申請個簽證,而唔係合資格就攞到個簽證後先搵工,呢個絕對係先後因果嘅唔同。


講咗上面咁多廢話,都係果一句,今次英國幾移民政策改革,對於有興趣移咗民英國嘅香港人,肯定係寬鬆左同好處多過壞處。不過,無論大家想用邊個途徑都好,都係時候要裝備好自己,因為已經唔再係申請人同Home Office兩者之間嘅關系,而係勇武咁跳入世界職業HR鬥獸場。乜都唔好理,最基本要做嘅我估要提升英語水平。如果想申請T1 Startup,廿萬鎊當然係要有,但無乜做生意或者創業嘅信心的話,可能需要讀一啲課程,一來提升下自己嘅能力,以來响申請時候亦係一個Reference。至於技術移民方面,因為2021年先推行,大家有兩年時間去進修同改進自己。有樣好坦白嘅事,希望大家思考下,點解我哋香港人所謂搵多啲,以英國又好似同一份工賺小咗呢?係因為香港嘅物價令份人工水漲船高?香港人食到幾十年來剩番嘅時勢水尾?英國職場上嘅人才比香港差?還是香港人已經太耐無响國際職場競爭呢?


最後,我呢個死Agent又係趕客嘅時候,唔好淨係話英國,其實全世界嘅職場竟然變成鬥獸場一樣咁殘忍,只不過我哋香港人呢廿幾年黎,被時勢、機會、北水、塘水滾塘魚嘅環境縱壞咗。無論想唔想移都好,或者決定就去邊也好,都應該望住個世界去裝備到自己「好打得」。


#移民 #移民英國 #移民顧問 #死移民Agent #GoodbyeHKHelloUK #T1Entrepreneur #T1Startup #技術移民