唔係要挑戰權威，而係探索原則理由。
有朋友黎英國，發現一個好有趣嘅情況，覺得「西妹」同佢嗰啲香港仔女有啲唔同。「西妹」每次做錯事，就算比我鬧都好，除非老豆我真係著晒火，唔驚之餘係不停問點解自己係錯。解釋完之後，就會追問如果呢樣唔準，咁做嗰樣又得唔得（煩到嘔！）。
好大嘅可能性係「西妹」習染咗英式教育，嗰種講求原則理由同勇於表達自己想法嘅思考模式。做每件事背後一定有原因同理由，點解得，點解唔得，咩係對，乜係錯嘅邏輯。呢樣嘢，响學校對住老師嘅情況就更明顯。對於老師嘅身份，英國人雖然始終有份尊敬，但意見上學生同老師係對等嘅。唔會有「一定要聽老師話」，或者「老師教嘅唔準駁嘴」，呢種盲目嘅心態。
例如，每個星期學校總有一段時間，剩係比班小朋友講自己想講嘅經歷（Show and Tell），嗰一刻個小朋友就係主角，就算係老師都只係聽眾。就係咁，呢種思維模式自然會帶返屋企，即係父母係要尊重，但唔代表一定啱晒。話我錯咩？點解呢？咁點做先係啱呀？
對於做老豆嘅係咪煩？係！但總好過學做一個，所謂好乖同聽話又無諗法嘅順民。