港式教育著重啲乜，當然係小朋友嘅成績或者係所謂嘅成就。而啲家長嘅焦點，好自然都只係會集中响自己個天才寶寶身上。彷彿處處都係競爭同比賽，點會咁得閒諗其它同學仔，更加唔會考慮成班呢個羣體。英國嘅學校普遍係點，我得一粒「西妹」，我唔知。但佢間學校就唔鼓勵同學仔有best friend嘅個概念。原因係為咗個羣體，點解呢？
早兩日去「西妹」間private school嗰啲家長分享會，聽下班「老細」嘅進度同情況。當有個家長話個女同「西妹」好快成為best friend嘅時候，老師就立即提醒，學校係唔多鼓勵小朋"best friend"呢個概念。學校覺得小朋友（尤其是女校），响小學初期有一堆堆best friends 同peer group，就好容易做成聯群結黨，亦都會孤立咗比較慢熱嘅同學仔，而好多時嗰啲欺凌事件就係咁慢慢形成。
可能大家會同我個港產腦一樣，忍唔住會彈啲黑人問號，小朋友同邊個friend啲點控制呀？關家長乜事喎？老師話日常會盡量習慣班「老細」當班同學係一個集體，不停調位換學習嘅對手，令啲同學間習慣大家都係朋友，無高與低，best or worst。而我地做家長嘅，就應該鼓勵佢地响屋企講多啲其他同學嘅嘢，唔好比佢地講黎講去都係熟啲嗰三兩個。到年紀大些少，先自然發展啲友誼同好友都未遲。
唔知成效有幾多，但諗唔到理由唔配合。為他人同羣體著想，係香港人甚至華人嘅弱項黎嘅。